Në galaksinë tone, 8.8 miliardë planete të ngjashëm me Tokën

Në galaksinë tone, 8.8 miliardë planete të ngjashëm me Tokën



Vetëm në galaksinë tonë janë të paktën 8.8 miliardë planete të ngjashëm me Tokën, domethënë planete që kanë ujë në formë të lëngshme dhe mikpritës të jetës. Në këtë përfundim ka mbërritur puna kërkimore disavjeçare e një grupi astronomësh të Universitetit Berkeley në Kaliforni të udhëhequr nga Erik Petigura.

Rezultati i studimit është publikuar në revistën “Pnas”. Në bazë të të dhënave të mbledhura nga teleskopi “Kepler” besohet se në Rrugën e Qumështit janë nga 40 deri në 50 miliardë yje. Shkencëtarët e NASA-s pranojnë se 22 për qind e këtyre yjeve kanë karakteristikat e Diellit tonë, që do të thotë madhësi dhe planete në distancë përafërsisht të njëjtë si në sistemin tonë diellor.

Nëse këtyre shifrave u shtohet edhe numri i yjeve me përmasa më të mëdha, numri i planeteve që rrotullohen rreth asaj që shkencëtarët e quajnë “zona e jetës”, në yllin përkatës do të shtohej me 20 miliardë.

“Zona e jetës” quhet orbita e përshkuar nga një planet që ndodhet në një distancë të favorshme nga ylli përkatës (si Toka) që mundëson zhvillimin e jetës.

Sipas studiuesve të universitetit kalifornian, planeti më i afërt (ndoshta) që ka jetë ndodhet rreth 12 mijë vite dritë larg. Petigura dhe kolegët e tij analizuan të dhënat nga 42 mijë yje të ngjashëm me Diellin “ku gjetën” 603 planete, 10 me diametër sa Toka dhe një ose dy prej tyre që orbitonte në “zonën e jetës”.

Hapi i mëtejshëm, thonë shkencëtarët, është studimi me anë të teleskopëve të fuqishëm të atmosferës së këtyre planeteve për të kuptuar nëse vërtet janë në gjendje të mirëpresin jetë. Pavarësisht këtij rezultati, vetë studiuesit përmbahen duke deklaruar se jo të gjithë planetet e ngjashëm me Tokën mund të kenë jetë.

Ata thonë se ekziston mundësia që në shumë prej tyre dendësia e atmosferës të jetë aq e madhe sa do t’i bënte ata shumë të nxehtë dhe të papërshtatshëm për mbijetesën e molekulave të ADN-së.