Hipnoza në vend të anestezionit total

Hipnoza në vend të anestezionit total?

Në Klinikën Universitare në Bruksel, të premten e kaluar është bërë një intervenim kirurgjik i heqjes së gjëndrës tiroide, në të cilën pacientja është vënë në gjumë më anë të hipnozës e jo anestezionit total, siç është vepruar deri më tani.

Christel Place vendosi që gjatë operacionit të gjëndrës tiroide të binte në gjumë përmes hipnozës e jo përmes anestezionit total. Një e treta e të gjitha operacioneve të gjëndrës tiroide dhe një e katërta e të gjitha operacioneve të kancerit të gjirit, në këtë spital bëhen nën hipnozë.

Pacientët të cilët vendosin për këtë lloj të operacionit, janë nën ndikimin e qetësuesve, mirëpo tërësisht të vetëdijshëm, ndërsa mjekët thonë se koha e shërimit për këta pacientë është më e shkurtër, ndërsa kanë nevojë për më pak ilaçe kundër dhimbjeve. Hipnoza është e përshtatshme vetëm për disa lloje të operacioneve, ndërsa përparësia qëndron në atë se nuk ka “efektin e trullosjes” pas këndelljes, i cili është tipik për anestezionin e përgjithshëm.

Në Klinikën Universitare në Bruksel, operacionet e tilla praktikohen që nga viti 2003, ndërsa mijëra pacientë vendosin për të.

Përparësia e kryerjes së operacionit nën hipnozë, përveç shërimit të shpejtë është edhe kursimi i parave. Përdoren shumë më pak anestetikë lokalë të cilët kombinohen me hipnozë. Nga ana tjetër, nevojitet edhe angazhim më i madh i mjekëve para operacionit, por edhe kujdes më i madh gjatë vetë operacionit.

Dr. Fabienne Roelants, anestiolog e përshkruan hipnozën si një gjendje e ndryshuar e vetëdijes: “Mendja e pacientit është në një vend të rehatshëm derisa trupi mbetet në sallën e operacionit”. Ajo shpreson se së shpejti edhe operacioni i hernies, artroskopitë dhe kirurgjia plastike do të bëhen nën hipnozë.

Ky lloj anestezioni është bërë shumë i famshëm gjatë viteve të fundit në Francë dhe Belgjikë. Disa kirurgë plastikë nga Gjermania e përdorin po ashtu, kurse në Britani është standard në praktikën stomatologjike.

Shoqata e anesteziologëve francezë e përshkruan hipnozën si zëvendësues të vlefshëm të anestezionit, për shkak se zvogëlon stresin, ankthin dhe dhimbjet.