“Nuk dua të jetoj në një botë ku gjithçka regjistrohet”

“Nuk dua të jetoj në një botë ku gjithçka regjistrohet”



Është një çështje që ka tronditur mbarë botën. Lajmi i publikuar fillimisht në gazetën “The Guardian” se agjencitë amerikane të sigurisë dhe inteligjencës mbledhin miliona të dhëna nga interneti dhe telefonat, për njerëz të ndryshëm në mbarë botën, ka shqetësuar gjithkënd.

Tani gazeta britanike ka zbuluar se kush është burimi i saj.

Ai quhet Edward Snowden, 29 vjeç, ish- punonjës teknik në CIA dhe aktualisht i punësuar pranë kontraktorit në fushën e mbrojtjes Booz Allen Hamilton. Të gjitha veprimet kryheshin për llogari të Agjencisë së Sigurisë Kombëtare (NSA).

Identiteti është publikuar me vetë dëshirën e tij.

Ndërkohë në SHBA kjo çështje i është referuar Departamentit të Drejtësisë si një çështje kriminale, njofton BBC.

The Guardian shkruan se Snowden ka fluturuar në Hong Kong më 20 maj, ku gjendet në një hotel.

Ky whistleblower i ri ka zbuluar detaje të frikshme se si përgjohen njerëzit në mbarë botën, duke përdorur një program të quajtur Prizëm.

I pyetur se përse e bëri këtë rrëfim, 29- vjeçari thotë: “Nuk dua të jetoj në një botë ku gjithçka bëj dhe gjithçka them, regjistrohet”.

Sistemi Prizëm u jep zyrtarëve të sigurisë amerikane akses të lehtë në të dhënat e nëntë gjigandëve të internetit, përfshi Google, Facebook, Microsoft dhe Skype.

Snowden thotë se veproi pasi u bind se këto veprime të qeverisë amerikane janë një kërcënim ndaj demokracisë.

Tani ai thotë se druhet për jetën e tij pasi mund të rrëmbehet ose mund të kthehet në SHBA ku e pret një dënim me burgim të përjetshëm, në mos një ekzekutim me urdhra të Uashingtonit.

“Unë nuk pres që të shoh më shtëpinë time,” thotë ai nga Hong Kongu.

Ai thotë se do të kërkojë azil politik nga çdo vend që beson në fjalën e lirë dhe që është pro mbrojtjes të privatësisë.

“Nuk kam pse fshihem sepse e di që nuk kam bërë diçka të gabuar. I vetmi motiv i imi ka qenë që të informoj publikun,” thekson Snowden.

Dhe Snowden ka arsye të forta për të qenë i shqetësuar. NSA është organizata më e fuqishme dhe më sekrete në botë.

Skandali shpërtheu kur Guardian publikoi një informacion se një gjykatë amerikane ka urdhëruar në mënyrë sekrete kompaninë telefonike Verizon që të dorëzojë për NSA miliona të dhëna.

Më pas u publikua lajmi se NSA mund të hyjë direkt në serverat e nëntë kompanive gjigande në internet si Facebook, Google, Microsoft, Yahoo, Skype.

Këto kompani kanë mohuar se i kanë dhënë qeverisë amerikane akses në serverat e tyre.

Skandali me përgjimet, spiunoheshin dhe zyrtarë të BE



Pjesë e skandalit të përgjimit nga agjencitë amerikane të sigurisë janë bërë dhe vende të Bashkimit Europain. Italia, Gjermania dhe Franca janë tre shtetet që kanë dhënë informacione për projektet e agjencisë amerikane, National Security Agency.

Gazeta angleze “The Guardian” shkruan se Wayne Madsen, personi që zbuloi për publikun historinë e përgjimeve të mijëra njerëzve, ka deklaruar se shumë shtete të Bashkimit Europian, jepnin informacione për SHBA.

Ndërsa revista gjermane, “Spiegel” nxjerr një fakt tjetër në dritë me historinë e përgjimeve. Ajo shkruan se ambasadat e SHBA dhe agjencitë kanë spiunuar dhe diplomatë dhe kompjuterët e Bashkimit Europian.

Ndërsa për shkëmbimin e informacionit me vendet e BE, mediat ndërkombëtare shkruajnë se SHBA ka marrëveshje sekrete me shumë prej tyre. Skandali i përgjimeve nisi një muaj më parë, ku Wayne Madsen nxori një muaj më parë informacion mbi përgjimin e mijëra banorëve nga National Security Agency.

Snowden ka dokumente më të rrezikshme

Spiuni i inteligjencës amerikane, Edward Snowden, ka informacione akoma më shkatërruese, të cilat mund të kthehen në një “makth” për qeverinë e Shteteve të Bashkuara, ka bërë të ditur gazetari, i cili botoi i pari dokumentet e tij.

Glenn Greenwald, gazetar i “Guardian”, tha për gazetën argjentinase “La Nacion”, se bërja publike e informacioneve të mëtejshme, që do të dëmtonin rëndë Amerikën, nuk është objektiv i Snowden.

Gjithsesi, sipas tij, Snowden ka një “numër të madh” dokumentesh, në lidhje me programet e përdorura nga njerëzit “duke pranuar pa ndërgjegje nënshtrimin e të drejtave të tyre për privatësi”.

Snowden ka dhënë kopje të tyre te disa njerëz, tha Greenwald për gazetën, sipas një versioni të artikullit të përkthyer në anglisht.

“Qeveria amerikane duhet të ulet në gjunjë e të lutet çdo ditë, që asgjë të mos i ndodhë Snowden-it, sepse në rast të kundërt, i gjithë informacioni do të zbulohet dhe ky do të ishte makthi për i keq për ta”, tha ai.

Edhe disa persona të tjerë kanë paralajmëruar të njëjtën situatë, më herët. Kristinn Hrafnsson, një zëdhënëse e Wikileaks, tha muajin e kaluar se sekrete të tjera mund të publikohen. “Ka ende për t’u publikuar”, tha gazetari britanik.

Snowden është një ish-teknik kompjuterash për kontraktorin amerikan të mbrojtjes, Booz Allen Hamilton. Në qershor, ai i dha Greenëald dhe kolegut të tij, Ewen MacAskill, një video-intervistë 12 minutëshe, në lidhje me faktin se përse vendosi t’ia jepte Guardian-it dokumentet sekrete në të programeve të survejimit amerikan.

Pas këtij veprimi, ai u nis për në Hong Kong, e më pas për në Rusi, ku ai ndodhet ende në një hapësirë tranzite, të një aeroporti në Moskë, dhe pa azil politik.

Ai ka kërkuar azil nga Rusia, teksa pret të udhëtojë i lirë për në Amerikën Latine, sipas Wikileaks. Ende nuk është marrë asnjë aplikim nga Snowden, tha kreu i Shërbimit të Migracionit të Federatës Ruse, Konstantin Romodanovsky, për agjencinë e lajmeve ruse, Interfax.

Presidentët e Venezuelës dhe Bolivisë kanë thënë se vendet e tyre do t’i ofronin atij azil, ndërsa ai i Nikaraguas ka pohuar se mund t’ia ofrojë “nëse rrethanat ia lejojnë”.

Snowden përballet me akuza spiunazhi në Shtetet e Bashkuara.