Sekte - “Profet” të vetëshpallur

“Jezu Krishti” i Siberisë



Thellë në malet Taiga të Siberisë jeton Vissarioni, lider i një kulti, i cili i ngjason Jezu Krishtit dhe që pretendon se është zëri i Zotit. Ai njihet si “mësuesi” i 4.000 ithtarëve, i cili në shikim të parë duket krejtësisht normal. Me kalimin e kohës, megjithatë, ai nis të tërheqë vëmendjen me besimin e palëkundshëm në jashtëtokësorë dhe shkatërrimin përfundimtar të Tokës. E në gjithë predikimet e tij për UFO-t dhe Ditën e Gjykimit, ai përcillet me ovacionet e ithtarëve besnikë.

Ish-polici i trafikut, Sergei Torop, e quan veten “Vissarion” dhe thotë se është vetë Jezu Krishti, i cili sjell në Tokë zërin e Zotit, falë një përvoje mistike që e kishte përjetuar qysh në vitet nëntëdhjetë, kur e kishte “kuptuar” se në fakt është riinkarnimi i shpëtimtarit të shenjtë. “Jezu Krishti” siberian është bërë temë e një dokumentari të metrazhit të shkurtër të televizionit rus “Vice”.

Me flokët të gjatë, mjekrën të dendur dhe veshjen, Torop vërtet i ngjason fizikisht Jezu Krishtit dhe kjo gjë duket se është më se e mjaftueshme që mbi 4.000 ithtarët e tij të besojnë se ai është vërtet i biri i Zotit. Me këtë “dëshmi” megjithatë mjaftohen edhe dhjetëra e mijëra besimtarë të tij nëpër të gjithë botën, të cilët vetëm sa shkojnë e shtohen me kalimin e kohës.

Në shikim të parë, ata duken sikur njerëz krejtësisht normalë që shëtisin herë pas herë në të kaluarën, por kur njëherë anëtarët e këtij sekti nisin t’i shpjegojnë në mënyrë të hollësishme besimet e tyre, gjërat nisin të bëhen të çuditshme. Pas vetëm disa frazave, bëhet e ditur se rrëfimi ka nisur në një drejtim klasik sekti dhe më pas në të përfshihen edhe jashtëtokësorët dhe pritjet e Ditës së Gjykimit.

Torop është shembulli i fundit i adhurimit të “kulteve të personalitetit” në Rusi – një obsesion kombëtar që daton qysh nga ditët e Rasputinit. Si Lenini ashtu edhe Stalini ua kanë imponuar rusëve që të përqafojnë figurat e fuqishme dhe të adhurojnë besime fetare.

Kritikët në Rusi e kanë akuzuar Vissarionin se po e plaçkit komunitetin e tij luajal, për përfitime personale.

Gjatë viteve të fundit ai kishte udhëtuar në Francë, Itali dhe Holandë për të “konvertuar” besimtarë të rinj, edhe pse pretendon se vizitat e tij ishin sponsorizuar nga nikoqirët dhe se Kisha e tij nuk përfiton para.

Sekti i “profetit” të vetshpallur

Prokurorët rusë ngritën akuza të abuzimit të fëmijëve ndaj anëtarëve të një sekti fetar musliman, i cili mbajti disa prej fëmijëve në bodrume nëntokë për më shumë se dhjetë vjet.

Akuzat më të rënda bien mbi themeluesin 83-vjeçar të sektit, Faizrakhman Satarov, i cili e konsideron veten një profet të dërguar prej Zotit.

Sekti vazhdoi funksionimin e tij për më shumë se një dekadë, në Kazan, kryeqytetin e Republikës së Tatarstanit, ku mbizotërojnë besimtarët muslimanë.

Pasi pretendoi se i erdhi frymëzimi hyjnor dhe u vetshpall profet, një pretendim që bie ndesh me principet themelore të islamit, Satarov urdhëroi 70 ndjekës të tij që të ndërprinin kontaktet me botën e jashtme dhe të jetonin në qeli të nëndheshme, që ai kishte ngritur brenda banesës së tij.

Të paktën 20 fëmijë, të moshës nga një deri në 17 vjeç, jetuan në këto qeli për vite me radhë, disa prej të cilëve pa parë kurrë dritën e diellit.

Lajmi ka tronditur banorët e Kazanit, një qytet kozmopolitan me 1,5 milionë banorë, ngritur në pikëtakimin midis lumenjve të Vollgës dhe Kazankës.

Kazanka, për shkak të popullsisë së tij të përzier, konsiderohet në mbarë vendin si një shembull i përkryer i harmonisë dhe tolerancës fetare.

Ndërron jetë profeti i vetëshpallur



I vetëshpallur profet dhe udhëheqësi i Kishës së Bashkimit, Sun Myung Moon, ndërroi jetë ditën e hënë në moshën 92-vjeçare.

Praktikat e tij fetare ishin bërë të famshme nëpërmjet ceremonive masive të martesave, në të cilat me mijëra çifte lidheshin në martesë njëkohësisht, ndonëse nuk e njihnin njëri-tjetrin, pas një kombinimi të bërë nga kisha.

Sipas Moon, kombinimi i bazuar në kritere të panjohura për publikun ishte një garanci për një martesë të shëndetshme.

Myung Moon pretendonte se me miliona persona ishin anëtarë të kishës së tij në të gjithë botën, por kritikët nuk rreshtën së e akuzuari për “shpëlarje” të trurit dhe përfitim nga profetizimet e rreme.

Kisha me qendër në Seul, kryeqyteti i Koresë së Jugut, ka disa dhjetëra besimtarë edhe në vendin tonë.

Moon ndërtoi gjatë jetës së tij një perandori ekonomike, duke ngritur gazeta, fabrika armatimi, universitete dhe menca e kompani ushqimore.

92-vjeçari vuante prej dy javësh prej pneumonisë. Një zi 13-ditore u shpall nga Kisha e Bashkimit, ndërsa funerali i tij u programua në 15 shtator.

”Ai ishte babai unë dhe një profet i dërguar nga Perandia. Trupi i tij u krijua posaçërisht nga Zoti, prandaj shpresonim që do të jetonte përtej një shekulli”, deklaroi ndihmësi i tij, Bo Hi Pak, për gazetarët.

Djali më i ri i Moon, Hyung-jin Moon, është shndërruar në pasardhësin e tij në krye të kishës.

I lindur në Korenë e Veriut, Moon gjithmonë pretendoi se në moshën 15-vjeçare i erdhi frymëzimi hyjnor dhe se që prej atëherë fliste me Zotin.