Shtëpia e mallkuar në Novi Pazar

Shtëpia e mallkuar në Novi Pazar

Shtëpinë e Es Vrujçanit nga lagjja Hagjet e Novo Pazarit e kanë pushtuar shpirtrat ndërsa për shkak të trazirave të shkaktuara përreth shtëpisë së tij u detyrua të intervenojë edhe policia.

Mediat serbe shkruajnë se qytetarët mblidhen përreth shtëpisë dhe falen duke u përpjekur që me falje t’i ndihmojnë familjes Vrujçanin që të çlirohet nga shpirti i keq, respektivisht dreqi. Policët me dy automobila po ruajnë shtëpinë e “pushtuar” për të parandaluar grumbullimin e njerëzve aty.

Familja luti të tubuarit që të mos qëndrojnë para shtëpisë. Thuhet se në shtëpi gjenden hoxhallarë të cilët lexojnë Kuranin, ndërsa disa prej tyre kanë ardhur bile edhe nga Bosnja.

Dëshmitarët thonë se dreqi më së shumti rri në kulm, është i gjatë dy deri në tri metra, i veshur me të bardha dhe nuk i shihet fytyra. Disa bile thonë se shpirti dhe Es Vrujçanin janë kapur fyt me fyt dhe se hija ia ka shqyer këmishën.

Besimtarët thonë se është hera e parë që ndodh një gjë e tillë në Novi Pazar. Gazeta serbe “Politika” shkruan se lagjja Haxhet është ndërtuar mbi varrezat e myslimanëve të pushkatuar gjatë viteve 1944-1945.