Shenjat flasin

SHENJAT FLASIN


Dashi

Unë jam Dashi shënja e parë,
Sypatrëmbur, sundimtar,
Përvëloj e djeg si zjarr.
Kam talent se jam i zgjuar,
energjik për të luftuar,
rezistent e i paduruar.

Jam plot jetë e gjallëri
Marsi me jep energji.


Demi

Thotë Demi jam punëtor,
Mjaft korrekt si në çdo orë,
Shumë besnik, konservator.
Jam i ndershëm e xheloz,
I duruar dhe kurioz
Dhe i vendosur sidomos.

Vishem bukur se kam shije
Afërdita më bën hije.


Binjakët

Por Binjakët me shkathtësi,
Thonë në zëmë shpejt miqësi,
Flasim bukur me mjeshtëri.
Jemi të zgjuar e s’durojmë,
Mendjen shpesh e ndërrojmë
Sa më shumë jetën shijojmë.

Se Merkuri na drejton
Plot mendime na dhuron.


Gaforrja

Romantike dhe e ndjeshme,
Jam e butë dhe e vëmendshme,
E përzemërt dhe e këndshme,
E kam mëndjen të zhvilluar,
Më pëlqen për t’më lavdëruar,
Thotë Gaforrja e duruar.

Hëna është drejtuesja ime.
Më fal ndjenja e kujtime.


Luani

I vendosur dhe i fortë jam,
Më kanë frikë se jam Luan,
Jam krenar, ekstravagant.
Rrezatoj unë në çdo vend,
Gjykoj drejt sepse kam mend,
S’mbaj inatin me askënd.

E mbaj veten si një mbret
Dielli i zjarrtë më jep jetë.


Virgjëresha

Jam punëtore e organizuar,
Mjaft praktike dhe e zgjuar,
Gjithmonë gati për të ndihmuar.
Jam e pastër si njeri,
Mësoj shpejt dhe me cilësi,
Virgjëreshë me kokëfortësi.

Kritikoj shpesh padrejtesitë
Ndaj Merkuri më bën dritë.


Peshorja

Mua askush nuk ma hedh dot,
nuk më thonë Peshore kot.
Më pëlqejnë veshjet me modë.
Jam e sjellshme dhe e dashur,
diplomate dhe e pastër,
Urrej shumë njerëzit e ashpër.

Me Venusin perëndeshë
Buza ime vetëm qesh.


Akrepi

Jam i këndshëm dhe besnik,
Për të gjithë jam magnetik
Nga armiqtë nuk kam frikë.
Këmbëngulës e kundërshtar,
T’i them fjalët ballë për ballë,
Jam Akrep, mister i rrallë.

Veten nuk e përmbaj dot
se Plutonin kam për zot.


Shigjetari

Liridashës dhe bujar
thotë i zgjuari Shigjetar
Jam nevrik e autoritar.
Optimist dhe i sinqertë,
për mendime jam i shpejtë,
Filozof dhe shumë i drejtë.

Aventura më tërheq
Jupiteri më udhëheq.


Bricjapi

Jam Bricjap me mend në kokë,
Shumë serioz dhe pak i ftohtë
Kërkoj shumë e s’ngopem dot.
Nuk flas kot vetëm punoj,
Disiplinën respektoj,
Ambicioz dhe shumë duroj.

I marr gjërat me ngadalë
Se Saturni nuk më fal.


Ujori

Thotë Ujori rrallë zemërohem,
Më pëlqen të rebelohem,
Kur veproj, para mendohem.
kam një tip origjinal,
Miqësor dhe liberal
jam human e di të fal.

Me Uranin sundimtar
Mund të bëhem shkencëtar.


Peshqit

Misteriozë dhe romantikë,
Nga natyra artistikë,
emotivë e simpatikë.
Jemi të drejtë dhe bujarë,
Intuitivë dhe ëndërrimtarë,
Peshq me shpirt humanitar.

Ne si shenja më e fundit
I shërbejmë vetëm Neptunit.

Krijoi: Nikolaos - www.astro-al.page.tl

shum, shume e bukur!

Vjersh astrologjike e mrekullueshme.Bravo Nikolaos.