Falltaret do të gjobiten nëse gabojnë

Falltaret do të gjobiten nëse nuk nxjerrin parashikime të sakta



Në Rumani pritet të kalojë një projektligj i cili përcakton se falltaret e magjistaret do të gjobiten, ose dhe do të burgosen, nëse parashikimet e tyre nuk dalin të vërteta. Falltaret e magjistaret do të duhet gjithashtu të marrin leje për ushtrimin e profesionit dhe do të duhet t'iu dorëzojnë klientëve fatura.

Kryemagjistarja Bratara Buzea, e cila pohon se i ka marrë aftësitë e saj nga nëna, gjyshja dhe stërgjyshja e saj, në një reagim të saj kundër masave të qeverisë tha: "Ç'faj kemi ne nëse klienti jep të dhëna të gabuara për veten?"

Ndërkaq muajin e kaluar Rumania miratoi ligjin që i detyron falltaret, magjistaret dhe astrologet të paguajnë taksë të të ardhurave si të gjithë të vetëpunësuarit e tjerë. Shumë prej tyre e kundërshtuan ligjin duke mallkuar funksionarët e qeverisë e duke hedhur madërgonë në lumin Danub, por disa të tjera e mirëpritën si legalizim të profesionit.